Dichtneiging #15 - Ve'dan

Wilt wij wat meer ruumte

of juust nog wat minder?

Kiest wij veur de oalen

of veur oonze kinder?

Huurt wij verderop wat

en goa'w' een stuk loop'n?

Of blie'w' ma' 'an 't spoar'n

to'w' hier wat kunt koop'n?

Linksof of rechtsof?

Wij wilt we ve'dan.

Ma' woar möt't op 'an?

Blieft wij de breur trouw

of juust oonze zuster?

Kiest wij veur geschrei

of toch eerst voor gelöster?

Spitst wij de oor'n 

en stoa'w' doarbij oop'n?

Of mö'w' nou zo nödig

het vel duur verkoop'n?

Ve'daag nog of mo'n?

Wij wilt we ve'dan.

Ma' woar möt't op 'an?

Loa'w' 't zoas 't nou is

of mö'w' 't an 't veraander'n?

En mö'w' dat dan zölf doen

of loa'w' dat 'an aander'n?

Mö'w' veur verbeet'ring

eerste schade anrich'n?

Of wördt 't 'ok beter

a'w' de boel ma' loat ligg'n?

Acht'ruut of veuruut?

Wij wilt we ve'dan.

Ma' woar möt't op 'an?

Brengt wij mekaar graag

op aand're gedach'n?

Of wilt wij ook leepheid

van aander'n verwach'n?

Zu'w' ooit met mekaar 

d'r nog uut kunn'n komm'n?

Of blef 't volk bestoan

dat 't niks kan verdomm'n?

Allennig of saam'n.

Elk wil we' ve'dan.

Ma' woar möt't op 'an?